الترمس المطحون ... من اعظم اسرار الطبيعة

الطبيعة مليانة بالخيرات والمفاجأت اللى بتخلينا احيانا نستغرب اننا بنهرب منها للمركبات الكيماوية ومن ضمن المعجزات الطبيعية اللى كتير مننا مش بتهتم بيها هى الاعشاب الطبيعية ... تخيلو ان كل مستحضرات البشرة التجميلية والعلاجية اساسها هو الاعشاب لكن للاسف المواد الكيماوية اللى بتكون فيها بتسيب اضراراكتر من انها تكون ليها فوايد 

جدتى كانت دايما تقوللى الكيميا زى ما بتعالج حاجة بتبوظ بدلها ستين حاجة .

وكانت دايما تنصحنى بمكونات طبيعية كتير فعلا تفيدنى ومن ضمن المكونات الطبيعية المفيدة جدا الترمس

النهاردة فى سهرتنا هانتكلم عن الترمس واد ايه هو مفيد جدا لحاجات ككتير اوى تخص جمالنا

اهم فوايد الترمس المطحون انه بيوحد لون البشرة وبيخلصك من الكلف والعلامات حب الشباب فى حالة استخدمتيه كماسك مرتين فى الاسبوع وتركيبة المسك بتفرق مع اختلاف نوع البشرة ممكن تمزجيه مع الزبادى والعسل اومع مية الخس والخيار او مع اللبن حسب نوع بشرتك سواء كانت دهنية او جافة او عادية

تانى فايدة من فوايد الترمس المطحون تنعيم بشرة الجسم بعد حمام البخار وده لما تعجنيه بمية الورد وتدهنيه على جسمك بعد الحمام السخن وبعد التكييس بالليفة المغربية حطيه على جسمك وسيبيه شوية وبعدها اشطفيه وده بينعم الجسم ويديله لون وردى وكمان مية الورد بتساعد على غلق المسام بتاعت الجسم وده طبعا احسن وارخص بكتير من التونر بكتييير

تالت فايدة من فوايد الترمس المطحون 

التخلص من قشرة الشعر وده لو عجنتيه مع الخل وحطيتيه على فروة راسك لمدة 10 دقايق وبعدها اغسليه ومشطى شعرك بمشط ضيق للتخلص من بقاياه اللى على الشعر

تابعونى كل يوم علشان تعرفو اكتر عن اسرار الطبيعة وطريقة استغلالها لصالح جمالك 

نورشاد